Bula de Inocêncio VIII relativa à instituição de uma capelania na igreja de S. Lourenço de Lisboa e à provisão de um capelão

Transcrição

Innocentius episcopus servus servorum Dei. Venerabili fratri Johanni episcopo Castrensis in civitate Ulixbonensis resident et dilectis filiis archidiacono ac cantori ecclesie Ulixbonensis salutem et apostolicam benedictionem. Sacrosancte romane(1) quam Dei filius Jhesus Christi auctor ipse pietatis instituit regimini presidentes ecclesie pia et salubria vota fidelium ex quibus in ecclesiis quibuslibet decor et venustas accrescit divini cultus augmentum salusque provenire speratur animarum pii patris affectione prosequimuretur illa optatum sortiantur effectum opem et operam libenter impendimus efficaces ad illos quoque dexteram nostre liberalitatis extendimus quos ad id propria virtutum merita multipliciter recomendant exhibita siquidem nobis nuper pro parte dilecti filii Roderici Luppi clerici Elborensis diocesis peticio continebat quod olim postquam quondam Vincentius Martini Frol(2) de Rosas nuncupatus civis Ulixbonensis tunc in humanis agens quoddam altare capellam nuncupatum in parrochiali ecclesia Sancti Laurentii Ulixbonensis de bonis sibi a deo collatis construi fecerat condens in eius ultima voluntate testamentum inter alia voluit et ordinavit duas perpetuas capellanias ad dictum altare per certos dicti testamenti executores ab eo deputatos de reliquis bonis suis fundari et dotari reliqua bona sua huiusmodi pro dictarum duarum capellaniarum dote obligando ac bona predicta ad effectum premissorum dispositioni et libere administrationi eorumdem executor relinquendo et deinde executores prefati ipso Vincentis vita functo certas domos vineam et possessiones tunc expressas et ad ipsum Vincentium dum vixit legitime pertinentes cum omnibus iuribus et pertinetiis suius pro dote dictarum cappellaniarum erigendarum cum onere certas missas in ibi celebrandi ac certis aliis honestis conditionibus que in divini cultus augmentum cedebant concesserunt et assignarunt prout in quibusdam publicis instrumentis de super confectis dicitur plenius contineri. Cum autem sicut eadem peticio subjungebat capellanie predicte nondum erecte fuerint et a memoria huiusmodi et presertim a sexaginta et pluribus annis citra misse que celebrari debebant celebrate non fuerint ac dilecti filii rector prior nuncupatus dicte ecclesie prioratus nuncupate necnon perpetui beneficiati in eadem ecclesia domos vineam et possessiones predictas detineant in debite occupatas fructus quoque redditus et proventus domorum vinee et possessionum predictarum qui vigintiquatuor ducatorum auri de camera valorem annum non excedunt pro dote duarum capellaniarum erigendarum duorum […] altare unus perpetuos capellanius duntaxat erigeretur et institueretur ac illi domus vinea et possessiones predicte pro illius dote perpetuo applicarentur et assignarentur ex hoc profecto divini cultus augmento consuleretur et voluntati dicti testatoris melius satisfieret ac domus vinea et possessiones predicte non remanerent in debite ocupate ac malum exemplum quod in partibus illis premissorum occasione Christi fideles habuerunt qui propterea a similibus fundationibus retrahuntur cessaret. Quare pro parte dicti Roderici nobis fuit humiliter supplicatum ut unam perpetuam capellaniam ad altare huiusmodi cum onere unam missam qualibet die ad dictum altare pro salute anime dicte testatoris celebrandi erigere et instituere aliasque in premissis oportune providere de benignitate apostolica dignaremur. Nos igitur qui divinum cultum ubique vigere et augeri nostris potissime temporibus suppremis desideramus affectibus de predictis certam noticiam non habentes ipsiumque Rodericum a quibuscunque excomunicationis suspensionis et interdicti aliisque ecclesiasticis sententiis censuris et penis a iure vel ab homine quavis occasione vel causa latis si quibus quomodolibet inodatus existit ad effectum presentium duntaxat consequendum harum serie absolventes et absolutum fore censentes ac omnia et singula beneficia ecclesiastica cum cura et sine cura que dictus Rodericus etiam ex quibusvis apostolicis dispensationibus obtinet et expectat ac in quibus et ad que ius sibi quomodolibet competit quecunque quotcunque et qualiacunque sint eorumque fructuum reddituum et proventuum veros annuos valores ac huiusmodi dispensationum tenores presentibus pro expressis habentes huiusmodi supplicationibus inclinati discretioni nostre per apostolica scripta mandamus quatinus vos vel duo aut unus vestrum si et postquam vocatis rectore et beneficiatis predictis ac aliis qui fuerunt enotandi vobis de premissis legitime constiterit unam perpetuam capellaniam sine cura ad(3) dictum altare(4) pro uno perpetuo capellano qui qualibet die ad dictum altare unam missam duntaxat per se vel alium celebrare teneatur sive alicuius prejudicio auctoritate nostra erigatis et instituatis ac illi pro eius dicte domos vineam et possessiones huiusmodi perpetuo applicetis et assignetis ac rectorem et beneficiatos predictos et quoscunque alios occupatores et detentores ad restitutionem illarum faciendam per censuras ecclesiasticas eadem auctoritate cogitis et compellatis iure tamen dicte parrochialis ecclesie et cuiuslibet alterius in omnibus semper salvo et nichilominus si erectionem et institutionem predictas per vos vigore presentum fieri contigerit ut prefertur capellaniam predictam cuius fructus redditus et proventus vigintiquatuor ducatorum similium secundum communem extimationem valorem annum ut idem Rodericus asserit non excedent ab eius primeva erectione huiusmodi vacantem cum omnibus iuribus et pertinentiis suis prefato Roderico eadem auctoritate conferre et assignare curetis inducentes per vos vel alium seu alios eundem Rodericum vel procuratorem suum eius nomine in corporalem possessionem capellanie tunc erecte iuriumque et pertinetiarum predictorum et defendentes inductum ac facientes Rodericum vel pro eo procuratorem predictum ad capellaniam tunc erectam huiusmodi ut est moris admitti sibique de illius fructibus redditibus proventibus iuribus et obventionibus universis integre responderi contradictores auctoritate nostra appellatione postposita compescendo non obstantibus voluntate testatoris et ordinatione executorum huiusmodi quibus quo ad hoc spetialiter et expresse derogamus ac constitutionibus et ordinationibus apostolicis contrariis quibuscunque seu si venerabili fratri nostro archiepiscopo Ulixbonensis vel quibusvis aliis communiter vel divisum ab apostolica sit sede indultum quod ad receptionem vel provisionem alicuius minime teneantur et ad id compelli aut quod interdici suspendi vel excommunicari non possint per litteras apostolicas non facientes plenam et expressam ac de verbo ad verbum de indulto huiusmodi mentionem et qualibet alia dicte sedis indulgentia generali vel speciali cuiuscunque tenoris existat per quam presentibus non expressam vel totaliter non insertam effectus huiusmodi gratie impediri valeat quomolibet (sic) vel differri et de qua cuiusque toto tenore habenda sit in nostris litteris mentio specialis. Nos enim ex nunc irritum decernimus et iname si secus super hiis a quoqua quavis auctoritate stienter vel ignoranter contigerit attemptari. Datum Rome apud Sanctum Petrum anno Incarnationis Dominice millesimo quadringentesimo octuagesimo nono idus Augusti. Pontificatus nostri anno quinto.

(1) Segue-se uma rasura por cima da qual surge um “desenho”.
(2) O “r” foi escrito sobre outra letra rasurada.
(3) Esta palavra foi escrita por cima de pergaminho rasurado.
(4) Esta palavra foi escrita por cima de pergaminho rasurado.